ଓଡ଼ିଶା ଲିଡ୍ସ(ବ୍ୟୁରୋ): ଆଜି ବରିଷ୍ଠ ନେତା ପ୍ରଭାତ ବିଶ୍ବାଳଙ୍କ ବାସଗୃହରର ୧୪ ଜଣ କର୍ପୋରେଟର ରୁଦ୍ଧଦ୍ୱାର ବୈଠକ କରିଛନ୍ତି । ଆସନ୍ତାକାଲି ନିଜ ପଦରୁ ଏହି ୧୪ ଜଣ କର୍ପୋରେଟର ଇସ୍ତଫା ଦେଇପାରନ୍ତି ବୋଲି ଚର୍ଚ୍ଚା ହେଉଛି । ପ୍ରଭାତ ବିଶ୍ୱାଳ ଓ ତାଙ୍କ ପୁତ୍ର ବିଧାୟକ ସୌଭିକ ବିଶ୍ୱାଳଙ୍କୁ ସମର୍ଥନ କରି କଟକ ଚୌଦ୍ବାର ଅଞ୍ଚଳର ଏହି କର୍ପୋରେଟର ମାନେ ଦଳ ଛାଡିବାକୁ ନିଷ୍ପତ୍ତି ନେଇଥିବା ଚର୍ଚ୍ଚା ହେଉଛି । କଟକ ଚୌଦ୍ବାର ନେତା ପ୍ରଭାତ ବିଶ୍ବାଳ ଏବଂ ସୌଭିକ ବିଶ୍ବାଳଙ୍କ ପ୍ରତି ହୋଇଥିବା ଅନ୍ୟାୟକୁ ନେଇ ଏହି କର୍ପୋରେଟରମାନେ ଦଳ ଛାଡିବେ ବୋଲି କହିଛନ୍ତି ।
କଟକ ଚୌଦ୍ବାର ଅଞ୍ଚଳର କର୍ପୋରେଟର ଅରବିନ୍ଦ ଜେନା କହିଛନ୍ତି, ପ୍ରଭାତ ଏବଂ ସୌଭିକଙ୍କ ପ୍ରତି ଯେଉଁଭଳି ଅନ୍ୟାୟ ହୋଇଛି ତାକୁ ବରଦାସ୍ତ କରିହେବନି। ଖାଲି କର୍ପୋରେଟର ନୁହଁନ୍ତି କଟକ ଚୌଦ୍ବାର ଅଞ୍ଚଳର ଅନେକ ସରପଞ୍ଚ, ସମିତି ସଭ୍ୟ ମଧ୍ୟ ଦଳ ଛାଡିପାରନ୍ତି । ପ୍ରଭାତଙ୍କୁ ଯେଉଁଭଳି ଭାବେ ଦଳରୁ ବହିଷ୍କାର କରାଗଲା ତାହା ଗ୍ରହଣୀୟ ନୁହେଁ। ଦଳ କେମିତି ଆଗକୁ ଯିବ ତାକୁ ନେଇ ସବୁ ବେଳେ ଉଦ୍ୟମ କରନ୍ତି ପ୍ରଭାତ। ପ୍ରଭାତ ଏବଂ ସୌଭିକଙ୍କ ଯଦି କୁଶପୁତ୍ତଳିକା କଟକ ଚୌଦ୍ବାର ଅଞ୍ଚଳରେ ଦାହ କରାଯାଏ ତେବେ ଆମେ ମୁହାଁ ମୁହିଁ ବିରୋଧ କରିବୁ। ଆମ ପାଇଁ ପ୍ରଭାତ ବିଶ୍ବାଳ ଆଗ ତା ପରେ ଦଳ। ପ୍ରଭାତଙ୍କ ଲୋକପ୍ରିୟତା ଅଛି ତାଙ୍କୁ ଦଳରୁ ବାହାର କରାଯିବା ଠିକ ହୋଇନି ବୋଲି କହିଛନ୍ତି କର୍ପେରେଟର ବିଶ୍ବ ବନ୍ଦିତା ପଣ୍ଡା।
ସିଏମସିରେ ୫୯ ଜଣ କର୍ପୋରେଟର ଥିବା ବେଳେ ଚୌଦ୍ବାର କଟକରୁ ଅଛନ୍ତି ୧୪ ଜଣ। ବିଜେଡିର ମୋଟ କର୍ପୋରେଟର ଅଛନ୍ତି ୪୨ ଜଣ। କଂଗ୍ରେସର ୮ଜଣ କର୍ପୋରେଟର ରହିଥିଲା ବେଳେ ବିଜେପିର ୭ ଜଣ କର୍ପୋରେଟର ଅଛନ୍ତି । ଦୁଇଜଣ ସ୍ୱାଧୀନ ଭାବେ ନିର୍ବାଚିତ ହୋଇଛନ୍ତି । କଟକ ଚୌଦ୍ବାର ସବୁ କର୍ପୋରେଟରଙ୍କ ଦାୟିତ୍ବ ପ୍ରଭାତ ବିଶ୍ବାଳ ନେଇଥିବା ବେଳେ କଟକ ବାରବାଟୀର ସବୁ ରର୍ପୋରେଟଙ୍କ ଦାୟିତ୍ବ ପ୍ରଭାତ ତ୍ରିପାଠୀ ନେଇଛନ୍ତି । ଆଗକୁ ଦୁଇ ପ୍ରଭାତ ମିଶି ସିଏମସିରେ ଭୂକମ୍ପ ସୃଷ୍ଟି କରିବେ ବୋଲି ଚର୍ଚ୍ଚା ହେଉଛି । ଖୁବ ଶୀଘ୍ର ମେୟର ସୁବାସ ସିଂଙ୍କ ବିରୋଧରେ ଅନାସ୍ତା ପ୍ରସ୍ତାବ ଆଗତ ହୋଇ ପାରେ ବୋଲି ଆଲୋଚନା ହେଉଛି । ଏଭଳି ହେଲେ ମେୟର ସୁବାସ ସିଂଙ୍କ ଆସନ ହରାଇବା ନିଶ୍ଚିତ । ଅନ୍ୟପକ୍ଷରେ ମେୟର ସୁବାସ ସିଂ କହିଛନ୍ତି ଜଣେ ଦୁଇ ଜଣ କର୍ପୋରେଟର ପଳାଇଲେ କିଛି ଫରକ ପଡିବନାହିଁ । ଆଗକୁ କଟକ ରାଜନୀତି ଯେ ଭିନ୍ନ ମୋଡ଼ ନେବ ଏଥିରେ ସନ୍ଦେହ ନାହିଁ ।
