ଓଡ଼ିଶା ଲିଡ୍ସ(ଯାଜପୁର): ବରୀ ଅଞ୍ଚଳର ପ୍ରମୁଖ ଜଳାଶୟ ଭାବେ କନ୍ତକାରର ପରିଚୟ ରହିଛି । କନ୍ତକାରକୁ ନେଇ ବହୁ ପୁରୁଣା ଲୋକକଥା ମଧ୍ୟ ରହିଛି । ଏହି ଜଳାଶୟ ଉପରେ ବରୀ, ରମ୍ପା, ଅରଙ୍ଗାବାଦ ପ୍ରଭୃତି ପଞ୍ଚାୟତର ଜନ ସାଧାରଣ ନିର୍ଭରଶୀଳ । ଗାଧୁଆ ପାଧୁଆ ସହିତ ବିଭିନ୍ନ ସମୟରେ ତୁଠ କର୍ମ ଏଠାରେ କରାଯାଏ । ବିଶେଷ କରି ବରୀ ମାଉଣ୍ଡ ଆଖପାଖରେ ହେଉଥିବା ପୂଜା ପାର୍ବଣ ସମୟରେ ଏଠାରୁ କଳସରେ ପାଣି ଉଠାଯାଏ । ଏହି ଜଳାଶୟ ଉପରେ ବରୀ ପଞ୍ଚାୟତ ସହିତ ବ୍ୟକ୍ତିଗତ ଲୋକଙ୍କର ମାଲିକାନା ମଧ୍ୟ ରହିଛି । କିଛି ବର୍ଷ ହେଲା ଏହି ଜଳାଶୟରେ ନାଗ ଦଳ ପୂର୍ଣ୍ଣ ହେବା ଫଳରେ ଏହା ପରିତ୍ୟକ୍ତ ଅବସ୍ଥାରେ ପଡି ରହିଥିଲା । ଏହାକୁ ସରକାରଙ୍କ ତରଫରୁ ସଫେଇ କରି ବ୍ୟବହାର ଯୁକ୍ତ କରିବାକୁ ସାଧାରଣରେ ଦାବି ହେଉଥିଲା ବେଳେ ପ୍ରଶାସନ ଏଥିପ୍ରତି କର୍ଣ୍ଣପାତ କରି ନଥିଲା । ଓଡ଼ିଶା ଲିଡ୍ସ ସହିତ ଅନ୍ୟାନ୍ୟ ଗଣ ମାଧ୍ୟମରେ ଏ ନେଇ ବାରମ୍ବାର ଖବର ପ୍ରକାଶ ପାଇଥିଲା । ପ୍ରଶାସନ ଏ ନେଇ କୌଣସି ପଦକ୍ଷେପ ନେଇ ନଥିଲା । ହେଲେ ଚଳିତ ବନ୍ୟା ସ୍ରୋତ ଫଳରେ କନ୍ତକାର ଦଳ ସଫା ହୋଇଛି । ଯାହାକୁ ନେଇ ସାଧାରଣରେ ଖୁସି ପ୍ରକାଶ ପାଇଛି ।
ମୁଖ୍ୟ ଜଳାଶୟରୁ ଦଳ ସଫା ହୋଇଥିଲା ବେଳେ କିଛି ସ୍ଥାନରେ ରହି ଯାଇଥିବା ଦଳକୁ ପ୍ରଶାସନ ପକ୍ଷରୁ ସଫା କରାଯାଇ ଏହାକୁ ବର୍ଷ ତମାମ ବ୍ୟବହାର ଉପଯୋଗୀ କରିବାକୁ ଲାଲବିହାରୀ ମହାନ୍ତି, ସମରେଶ ଓଝା, ଅଧର କୁମାର ଜେନା, ଦୁର୍ଯ୍ୟୋଧନ ଜେନା, ନାରାୟଣ ବେହେରା, ମହେଶ୍ୱର ବେହେରା, ସଞ୍ଜୟ କୁମାର ବେହେରା, ବିଶ୍ଵଜିତ ମହାନ୍ତି, ବିଶ୍ଵଜିତ ବାରିକ, ଦର୍ଶନ ବେହେରା, ଅଶୋକ କୁମାର ବେହେରା ପ୍ରମୁଖ ଦାବି କରିଛନ୍ତି ।
